Միակ ձևաչափը, որ կարող է կենսունակ լինել, վերկուսակցական համախմբումն է. Արա Պապյան

Մենք ի սկզբանե, երբ նախաձեռնում էինք Ազգային-ժողովրդավարական բևեռի ձևավորումը, հրավիրել ենք նախկին և ներկա վարչախմբերի մաս չկազմած ու չկազմող բոլոր ուժերի ներկայացուցիչներին և հանրաճանաչ անհատ գործիչներին ու սեղանի վրա ենք դրել առաջարկվող համախմբման ձևաչափը և բովանդակությունը։

Որպես ձևաչափ՝ առաջարկել ենք վերկուսակցականությունը։

Նման ընտրությունը պատահական չէ, որովհետև կուսակցությունների կամ հասարակական-քաղաքական այլ կազմակերպությունների միավորումները կենսունակ չեն։

Հայաստանում տասնամյակներ շարունակ հաստատվել է օտարին ծառայող կիսագաղութային քողարկված բռնապետական ռեժիմ։ Դրա հետևանքով մենք չունենք բառի իրական իմաստով հասարակություն, քաղաքական համակարգ, քաղաքական ինստիտուտներ, այդ թվում՝ կուսակցություններ։

Եղածը ձևական է ու չկայացած, շատ դեպքերում՝ ռեժիմի ազդեցությանը ենթակա։

Նման պայմաններում կուսակցական միավորումները կարճ ժամանակ անց ճաքեր են տալիս և փլուզվում են, քանի որ ռեժիմի միջամտություններն ու կուսակցական շահերի բախումը թույլ չեն տալիս պահպանել համախմբումը։

Վերջին երեք տասնամյակների պատմությունը վատ իմաստով հարուստ է կես ճանապարհին մնացած և կազմաքանդված նման միավորումների օրինակներով։

Միակ ձևաչափը, որ կարող է կենսունակ լինել, վերկուսակցական համախմբումն է, երբ կուսակցական գործիչները վայր են դնում իրենց կուսակցական դրոշները և միավորվում են ոչ կուսակցական գործիչների հետ։

Բովանդակության առումով մենք առաջարկել ենք համախմբվել ոչ թե հանուն իշխանության կամ մի խումբ անձանց շահերի, այլ տասնամյակների ընթացքում կիսագաղութային կեղեքիչ կառավարման պատճառով ձևավորված ու խորացող համակարգային ճգնաժամը հաղթահարելու համար պայմաններ և նախադրյալներ ստեղծելու հակագնաժամային անցումային ծրագրի շուրջ, որի իրագործման համար անհրաժեշտ է կազմավորել հակաճգնաժամային անցումային կառավարություն։

Այն գործիչները, որ համաձայնության եկան վերը նշված վերկուսակցական ձևաչափի և հակաճգնաժամային անցումային ծրագրի ու կառավարման բովանդակության շուրջ, 2020 թ․ մայիսի 15-ին կազմեցին և հրապարակեցին Ազգային-ժողովրդավարական բևեռի կայացման և գործունեության մասին հռչակագիրը, որտեղ ներկայացված են Բևեռի ծրագրային հիմնադրույթները։

Միևնույն ժամանակ մենք՝ որպես Բևեռի նախաձեռնողներ, մշտապես բաց ենք թե Բևեռին մաս կազմելու ցանկություն ունեցող գործիչների հետ միավորվելու, թե համագործակցելու համար։

Եվ մշտապես ու այսօր էլ կոչ ենք անում միավորվել։

Սակայն մեզ համար սկզբունքային են վերը նշված երկու պայմանները՝ վերկուսակցական ձևաչափը և հակաճգնաժամային ծրագրի բովանդակությունը։

Եթե իրենց ազգային համարող ուժերի և գործիչների նպատակներն իրոք անկեղծ են, ապա նրանք առանց հապաղելու պետք է գան Ազատության հրապարակ և բոլորիս հետ միասին լծվեն թափ առնող ազատագրական պայքարին։

Ասվածի համատեքստում շատ ողջունելի է Բևեռի նախաձեռնած պայքարին միանալու վերաբերյալ Ազգային առաջընթաց կուսակցության հայտարարությունը, որը պետք է օրինակ ծառայի մյուսների համար։

Հատված Արա Պապյանի՝ Ազգային-ժողովրդավարական բևեռի տեսակետներն արտահայտող ելույթից, 9 ապրիլի 2021 թ., Ազատության հրապարակ