Սկսվել է հայ ժողովրդի քաղաքական Սարդարապատը

Մենք իրավունք չունենք այս տեմպը թուլացնելու, մեր հաջորդ հավաքը մի քանի օրից է լինելու, որի համար բոլորս պետք է պատրաստվենք, ոչ միայն այստեղ ներկաները, այլև ովքեր այսօր մեզ հետևում են ուղիղ եթերով, այդ տասնյակ հազար հայ մարդիկ և՛ Հայաստանում, և՛ Սփյուռքում մեր համախոհներն են, ես դրանում չեմ կասկածում:

Սփյուռքահայ սիրելի հայրենակիցնե՛ր, դուք ևս առաջիկա օրերի մեր հավաքի համար հեռվից աշխատելու եք: Ամսի 20-ին՝ շաբաթ օրը, ժամը 3-ին, այստեղ մենք մի քանի անգամ մեծ քանակով ենք հավաքվելու: Սփյուռքից զանգեք ձեր հարազատներին, հարևաններին, բարեկամներին, ընկերներին, հորդորեք ներկա գտնվելու այստեղ: Ուրիշ ճար չկա, ա՛յս է ուղին, գո՛րծ արեք, սիրելի հայրենակիցներ:

Նույնը վերաբերվում է հեռվից հետևողներին, նույնը՝ Հայաստանի Հանրապետության մարզերին:

Այո, մի քանի օրը մեկ, շաբաթը մեկ, ամենահեռու վայրերից ևս գալու ենք այստեղ, ինչպես այսօր ներկա են այստեղ Վարդենիսից, Ախուրյանից, Մեղրիից…: Բոլորն այսօր վերադառնալու են, մի քանի օր հետո նորից հավաքվելու համար և անպայման մի քանի անգամ ավելի շատ:

Սա մեր խնդրանքն է, ժողովուրդ: Մենք պայքարի մեջ մտել ենք, մեր գլխավոր զենքը մեր սերն է ձեր և մեր Հայրենիքի նկատմամբ:

Հարգեք մեր սերը:

Կեցցե՜ ազատ, անկախ և միացյալ Հայաստանը:

Հատված Ժիրայր Սէֆիլյանի՝ սույն թվականի մարտի 16-ին Ազատության հրապարակում Բևեռի համապետական հանրահավաքի ժամանակ ունեցած ելույթից