Ռուսաստանը Մեղրիի միջանցքը դնում է Բաքվի տնօրինության տակ: Եվ որպեսզի դա իրականանա, ФСБ-ն վերահսկում է.Արա Պապյան

«Մենք պետք է արդեն իսկ այդ պայմանագրի վերաբերյալ հստակ դիրքորոշում արտահայտած լինեինք։ Այն է՝ արդյոք դա մեզ համար ընդունելի է, ընդունելի չէ։ Առաջինը մեր դիրքորոշումը պետք է հստակեցնեինք։ Երկրորդ, պետք է դիմած լինեինք միջազգային դատարան՝ հայցելով խորհրդատվական կարծիք այդ փաստաթղթի կարգավիճակի վերաբերյալ։ Այսինքն՝ որքանո՞վ է այդ փաստաթուղթն ուժի մեջ, որքանով ուժի մեջ չէ։ Երրորդ, կարծում եմ, մենք պետք է դիմեինք Ռուսաստանին՝ պահանջելով, որ Ռուսաստանը և որպես Մոսկվայի պայմանագրի մաս, և Կարսի պայմանագրի մաս, իր դիրքրոշումը հստակեցներ դրա վերաբերյալ։ Որպես պետություն՝ նշվածս քայլերը պետք է անենք»,- նշեց Պապյանը։

Ըստ նրա՝ այդ փաստաթղթերը կնքման պահից եղել են անօրինական, որովհետև կնքող կողմերից որևէ մեկը չի հանդիսացել միջազգային իրավունքի սուբյուկտ։ «Պարզապես իշխանությունը զավթած կամ զավթել ձգտող երկու քաղաքական ուժ են եղել՝ Մոսկվայի պայմանագրի մասով՝ բոլշևիկներն ու քեմալականները, իսկ Կարսի պայմանագրի մասով՝ էլի քեմալականները, մյուս կողմից էլ չճանաչված տարածքներ, որոնք օկուպացված են եղել այդ պահին Կարմիր բանակի կողմից»,- ասաց նա։

Արա Պապյանը նաև հավելեց, որ մարտի 16-ին կայանալիք հանրահավաքում փորձելու են ավելի հնչեղություն տալ այս հարցերին։

«Մենք տեսնում ենք, որ 2020 թվականի նոյեմբերի 9-ի փաստաթուղթը նույն բնույթի է, երբ Ռուսաստանը Թուրքիայի հետ պայմանավորվում է և մեր տարածքների մի մասը՝ կոնկրետ Մեղրու միջանցքը դնում է Բաքվի տնօրինության տակ։ Եվ որպեսզի դա իրականանա, իր ФСБ-ի կողմից վերահսկում է։ Ըստ էության՝ դա ձևականորեն է մնում Հայաստանի կազմում, գործնական առումով դա դառնում է ադրբեջանա-ռուսական տարածք։ Խախտվում է Հայաստանի տարածքային ամբողջականությունը։ Պատմությունը կրկնվում է մեզ համար, պետք է քայլեր անել, որպեսզի տխուր հետևանքներ չլինեն»,- ասաց նա։

Հղում հեղինակին՝