Մարդիկ, ովքեր ապրում են «ապակե տներում», չպետք է «քարեր» նետեն

Ինչպես գիտեք ԱՄՆ-ում գտնվող Ազգային- ժողովրդավարական Բևեռի (ԱԺԲ) խորհրդի անդամներ Ժիրայր Սէֆիլյանը եւ Արա Պապյանը անցկացնում են հանդիպումներ ԱՄՆ ներկա և նախկին պաշտոնատար անձանց եւ հայ համայնքի ներկայացուցիչների հետ՝ նպատակ ունենալով ամրապնդել ԱԺԲ կապերը նշյալ շրջանակների հետ:

Ամերիկյան պաշտոնական շրջանակների հետ հանդիպումները կազմակերպելու համար ԱԺԲ-ն որպես պետական հանրային կապերի եւ հաղորդակցման մասնագիտացված միջնորդ ներգրավել է հանրաճանաչ Լիվինգստոն Գրուփ (The Livingston Group) կազմակերպությանը:

Օգտվելով ԱՄՆ-ում լոբիստական գործունեությունը կանոնակարգող օրենսդրության կողմից տրված թափանցիկությունից` սփյուռքահայ որոշակի խումբ փորձում է վարկաբեկել ԱԺԲ-ի եւ Լիվինգստոն Գրուփի համագործակգությունը՝ վերջինիս ակնհայտ ստահոդ կերպով ներկայացնելով որպես պրոթուրքական կազմակերպության:

Այդ ամենում նրանք իբրև թե հենվում են այն փաստի վրա, որ այն հանրային կապերի եւ հաղորդակցման միջնորդական ծառայություններ է տրամադրել Թուրքիայի (մինչև 2008 թ) եւ Ադրբեջանի (մինչև 2009 թ) կառավարություններին:

Հարկ է նշել, որ Վաշինգտոնում չկա գեթ մեկ խոշոր լոբիստական կազմակերպություն, որը ներկայացրած չլինի Թուրքիային կամ Ադրբեջանին:

Վերջիններս աշխատակցել են ամերիկյան բոլոր հայտնի միջնորդական կազմակերպությունների, այդ թվում Լիվինգստոն Գրուփի հետ:

Անհրաժեշտ է նաեւ նշել, որ իրականում, 2020-ին Լիվինգստոն Գրուփը 44-օրյա պատերազմի օրերին հրաժարվել է ստորագրել Ադրբեջանի կողմից իրենց առաջարկված պայմանագիրը:

ԱԺԲ-ի հետ Լիվինգստոն Գրուփի համագործակգությունը կառավարում է Էլիաս Գերասոլիսը, որը Վաշինգտոնում հայտնի հունական լոբիստ է, նախկինում American Hellenic Institute-ի օրենսդրական հարցերի գծով տնօրեն, իսկ Լիվինգստոն Գրուփը ներկայացրել եւ ներկայացնում է նաեւ հունական շահերը:

ԱԺԲ-ի համար պատիվ է Վաշինգտոնում ներկայացված լինելու Լիվինգստոն Գրուփի նման հեղինակավոր կառույցով, որն իր բնագավառի լավագույններից է՝ առաջ մղելու համար ԱՄՆ-ՀՀ կապերի ամրապնդման կարևորագույն օրակարգը:

Գիտակցված ապատեղեկատվություն տարածելու փոխարեն սփյուռքի հայտնի շրջանակին խորհուրդ ենք տալիս մտածել տասնամյակներ շարունակ Հայաստանի Հանրապետության (ներառյալ Արցախի) ինքնիշխանության վերականգնման եւ անվտանգության ամրապնդման կարևորագույն օրակարգից մեր հանրությանը շեղելուն ուղղված եւ Կրեմլի կողմից ուղղորդված իրենց գործունեության մասին:

Մարդիկ, ովքեր ապրում են «ապակե տներում», չպետք է «քարեր» նետեն:

Ազգային-ժողովրդավարական Բևեռի խորհուրդ

15.04.2023թ, Երևան