Ռուսաստանի նեոգաղութացման դեմ պայքար մղող Ազգային- Ժողովրդավարական Բևեռի գործունեությանն ու կազմակերպած ակցիաներին Ազատություն ռադիոկայանը մնում է անհաղորդ
ՀԱՅՏԱՐԱՐՈԻԹՅՈԻՆ
Դեռևս XX-րդ դարում հայ ազատ միտքը, բանտարկված լինելով Խորհրդային Միության զնդանում, օրական մեկ ժամ լսում էր ժողովրդավար Աշխարհի ձայնը` Ազատություն ռադիոկայանը: Բնականաբար բռնարար Կոմունիստական կուսակցությունը շատ հաճախ խլացնում էր այդ ձայնը, սակայն պատառիկներ այդուամենայնիվ հասնում էին, ինչն էլ բավարարում էր մարդկանց ազատ խոսք լսելու քաղցը, ինչպես նաև ձևավորում էր այն տեղայնացնելու անխոնջ վճռականությունը:
1988 թվականի Արցախյան շարժումը, բացի ազատագրական լինելուց նաև հանուն ժողովրդավարության պայքար էր: Այլ հարց է, որ ազատատենչ հայ ժողովրդի զրկանքների գնով նշված երկու ճակատներում ձեռք բերված հաջողությունները հետևողականորեն չեզոքացվեցին և Կրեմլի կողմից նշանակված հայաստանյան բոլոր ադմինիստրացիաները վերադարձրեցին մեզ ի շրջանս յուր` բռնաճնշված և անազատ երկրների շարք, որը զրկված է տնօրինելու իրեն պատկանող տարածքները:
Թվում էր, թե նման պայմաններում Ազատություն ռադիոկայանը պետք է գործեր տասնամյակներով գործող տրամաբանությամբ` ապահովելով ազատ խոսքի խրախուսումը և տարածումը, մնալով` ազատատենչության հարթակ: Ավաղ, Ազատություն ռադիոկայանը, շեղվելով իր առաքելությունից, մեր օրերում ոչնչով չի տարբերվում Հայաստանում գործող ռուսական գաղութային մյուս լրատվամիջոցներից` ըստ էության անթաքույց սպասարկելով Կրեմլի հակահայ և հակաարևմտյան շահերը:
Այդ է պատճառը, որ Ռուսաստանի նեոգաղութացման դեմ պայքար մղող Ազգային- Ժողովրդավարական Բևեռի գործունեությանն ու կազմակերպած ակցիաներին Ազատություն ռադիոկայանը մնում է անհաղորդ, անտեսելով դրանք, չի անդրադառնում նույնիսկ ի աջակցություն Ուկրաինայի կազմակերպած բազմամարդ միջոցառումներին:
Փոխարենը առատ լուսաբանում է պրոռուսական իշխանությունների և նույնքան պրոռուսական այսպես կոչված ընդդիմության յուրաքանչյուր աննշան և անբովանդակ քայլը:
Ազգային- Ժողովրդավարական Բևեռը ակնկալում է, որ Ազատությունը կվերանայի որդեգրած հակաժողովրդավարական քաղաքականությունը և կվերականգնի տասնամյակներով վաստակած իր բարի համբավը:
Ազգային-ժողովրդավարական Բևեռի խորհուրդ
15.06.2022, Երևան