Այս շարժումը հաջողություն չի ունենա, այն ավելի շատ հիշեցնում է անձնափոխության, իշխանափոխության ձգտում, քան հեղափոխություն. Արա Պապյան
Խորհրդարանական և արտախորհրդարանական ուժերը շարունակում են ապակենտրոն և ցանցային բողոքի ակցիաները։
ArmDaily.am-ի հետ զրույցում քաղաքագետ, «Ազգային ժողովրդավարական բևեռ»-ի լիդերներից Արա Պապյանը, խոսելով ընդդիմության գործողությունների մասին, ասաց, որ այստեղ կարևորը գործողություններ իրակացնելու ձևը չէ, քանի դեռ բռնություն չի կիրառվում, դա ընդունելի է։
«Այստեղ շատ կարևոր է՝ երբ ասում ենք ընդդիմություն, ապա պետք է հասկանանք, թե ինչի դեմ ընդդիմություն։ Ինձ համար ներկա իշխանությունների և այսպես կոչված՝ ընդդիմության նպատակները նույնն են ամենակարևոր հարցերում։ Մասնավորապես, Ռուսաստանի հետ հարաբերությունների հարցում, հստակ չի նշվում՝ ինչպես են պատկերացնում Արցախի խնդրի լուծումը, եթե նույն ինքնորոշման սկզբունքի հիման վրա է, երկուսն էլ դա տեսնում են, ուրեմն դա փակուղի է, ինչպես նաև չի հստակեցվում Թուրքիայի նկատմամբ քաղաքականության հարցը։ Սա ավելի շատ հիշեցնում է անձնափոխության, իշխանափոխության ձգտում, քան հեղափոխություն։ Դրա համար ես կարծում եմ, որ այս շարժումը հաջողություն չի ունենա, որովհետև այն պարզապես խարսխված է այն դրույթի վրա, որ իրենք ավելի լավ են, քան Նիկոլ Փաշինյանը, Նիկոլ Փաշինյանը պետք է գնա, մենք գալու ենք և շարունակելու ենք նույն քաղաքականությունը, միգուցե ինչ-որ հարցերում ավելի վատ, բայց իրենք ուզում են ժողովրդին համոզել, որ կլինի ավելի լավ»,- ասաց Պապյանը։
Քաղաքագետի կարծիքով՝ սկզբունքային հարցերում պետք է էական արմատական տարբերություններ լինեն, որպեսզի իրենք ընկալվեն որպես ընդդիմություն։
«Ակնհայտ է, որ ներկա ուժերը գործում են արտաքին թելադրանքով, մասնավորապես՝ Կրեմլի, և դա այնքան բացահայտ է։ Հետևաբար՝ չեմ կարծում, որ իրենք հաջողություն կունենան և ժողովրդից աջակցություն, եթե ինչ-որ ձևով հեղաշրջում չարվի, բայց համաժողովրդական՝ դասական հեղափոխական ձևով, որ հարյուր հազարավոր մարդիկ դուրս գան փողոց և իրենց ներկայությամբ ճնշեն ներկա իշխանություններին հրաժարական տալու, կարծում եմ՝ չի լինի։ Սա, կարծում եմ, Մոսկվայի կողմից բեմականացված շարժում է, որի բուն նպատակն է ապակայունացնել վիճակը Հայաստանում»,- ասաց Պապյանը։
Ըստ քաղաքագետի՝ Մոսկվան այսկերպ նախ ցանկանում է Նիկոլ Փաշինյանից կորզել հնարավորինս շատ զիջումներ, ապա զգուշացնել Փաշինյանին, որ իր կապերը և շփումները Արևմուտքի հետ Ռուսաստանի դուրը չի գալիս։
«Երրորդը՝ անկայուն, ոչ հստակ վիճակում միշտ հեշտ է առաջարկել որևէ փրկիչի։ Իրենք հասկանում են, որ ոչ Վանեցյանը, ոչ Քոչարյանը, ոչ Սերժ Սարգսյանը չեն կարող ժողովրդի մեջ որևէ աջակցություն ունենալ, բայց ընդհանուր ապակայուն վիճակի մեջ կարող են ժողովրդի համար ընդունելի նոր թեկնածուներ առաջ բերել և այդ ֆոնի վրա՝ կփորձեն այդ մարդկանց առաջ մղել։ Ես կարծում եմ, որ այս շարժումից հետո՝ առաջիկայում մենք կտեսնենք մեկ-երկու նոր քաղաքական հայտեր»,- ասաց քաղաքագետը։
Ինչ վերաբերում է այս շարժման ավարտին՝ ապա քաղաքագետի կարծիքով որևէ բան չի փոխի։
«Կարծում եմ՝ որևէ մեծ փոփոխություն չի լինի ոչ մի առումով՝ ոչ ներքին քաղաքական, ոչ էլ արտաքին։ Պետք է հաշվի առնել, որ ներկայում Հայաստանի ճակատագիրը պայմանավորված է ոչ այնքան ներքին զարգացումներով, որքան արտաքին։ Մանսավորապես՝ Ռուսաստան-Ուկրաինա պատերազմով։ Մեծ առումով, եթե քաղաքականությունը չփոխվի, Նիկոլ Փաշինյանի փոխարեն գա Իշխան Սաղաթելյանը, ապա դրանից ինչ է փոխվելու։ Միևնույնն է՝ Իշխան Սաղաթելյանը չի առաջարկում, օրինակ, Արցախի այդ փակուղուց դուրս գալու ճանապարհ, այս նույն ընդդիմությունը հիմա Վանեցյանի բերանով խոսում է ռուսների հետ ավելի սերտ հարաբերությունների մասին, ինչ-որ ռուս խաղաղապահների հետ համագործակցելու մասին։ Սրա լավը ո՞րն է։ Այսինքն՝ նույն քաղաքականությունն է ավելի պրոռուսական թեքումով»,- ասաց Պապյանը։
Նա նշում է, որ այսօր միակ լուրջ ընդդիմությունը Ազգային ժողովրդավարական բևեռն է, որը հստակ առաջարկում է ներկայում առաջարկվող ծրագրերից էապես տարբերվող ծրագիր։
«Իրենց ծրագրեր ես պայմանական եմ ասում, որովհետև ես ծրագիր չեմ լսել։ Իրենք ասում են՝ կապիտուլյանտին կապիտուլյացիայի ենթարկենք, շատ լավ, հետո՞։ Ես հետոն չեմ լսում։ Եթե Հայաստանին պետք է, օրինակ տարեկան 5 մլրդ դոլար ներդրում, հաստատ այս ռուսական ճանապարհը դա չի կարող ապահովել, որովհետև Ռուսաստանը ոչ դրա փողն ունի, ոչ էլ ցանկությունը։ Հայաստանին պետք է անվտանգության ապահովում Թուրքիայից և Ադրբեջանից, իսկ ռուսական կողմնորոշումը դա ապահովել չի կարող»,- ասաց Պապյանը։
Ինչ վերաբերում է ԱԺ բևեռի առաջիկա քայլերին, ապա Պապյանը չի կարծում, որ նրանք որևէ էական քայլ պետք է անեն այս օրերին։
«Ցանկացած մասնակցություն այս փողոցային երթերին մեզ նույնականացնելու է պրոռուսական և ռուսական ծրագրեր իրականացնող այդ մարդկանց խմբերի հետ, որին անձամբ ես դեմ եմ։ Բևեռը, կարծում եմ, հայտարարություններով իր դիրքորոշումն է հստակեցնում, դա շատ կարևոր գործընթաց է, ամրագրում է իր դիրքերը, մարդկանց բացատրում է։ Բևեռի ներկայացուցիչները ինտենսիվ հարաբերություններ և կապեր են զարգացնում արտաքին մի շարք երկրների հետ, որոնց հետ, մեր կարծիքով, կապված է մեր երկրի ապագան, փորձում ենք նրանց առավելապես ներգրավվել։ Երկու աստիճանի է մեր գործողությունները. Առաջինը՝ կանխում ենք Հայաստանի նկատմամբ պատժամիջոցները և փառք Աստծո, դա մենք բավականին հաջող կարողացել ենք անել, թեև ոմանք չեն հասկանում, որ նույն Ուկրաինայի դրոշի բարձրացնելը Երևանի փողոցներում փրկում է ՀՀ-ն նույն Վաշինգտոնի պատժամիջոցներից։ Գոնե նրանք տեսնում են, որ ինչ-որ քաղաքական ուժեր ու խմբեր կան, որոնք Ռուսաստանից անկախ են և չեն ծառայում Ռուսաստանին։ Մյուսն էլ նա է, որ մենք մեր ծրագրերն ենք ներկայացնում տարբեր երկրների և դրանով իսկ նոր հնարավորություններ ենք բացում Հայաստանի համար»,- ասաց քաղաքագետը։
Ավելի վաղ Հայաստանում Ամերիկայի դեսպանատան կողմից հայտարարություն տարածվեց, որով հորդորում էին ԱՄՆ քաղաքացիներին զգոն լինել, քանի որ մեծ բազմությունն անկանխատեսելի է, ինչպես նաև միջոցառման մասնակիցների և ոստիկանների միջև միջադեպեր և բռնություններ կարող են տեղի ունենալ նաեւ առանց նախազգուշացման։ Խոսելով այս հայտարարության մասին՝ Պապյանը նշեց, որ ամերիկացիները շատ զգուշավոր են և իրենց քաղաքացու կյանքը բարձր են գնահատում։
«Ես արտառոց ոչինչ չեմ տեսնում, եթե իրենք կոչով դիմել էին սեփական քաղաքացիներին՝ խուսափել մարդաշատ վայրերից, ավելի զգույշ լինել, որովհետև ի տարբերություն շատ երկրներից՝ այդ թվում Հայաստանից, իրենք իրենց քաղաքացուն չեն լքում, նրա կողքին են, որը հսկայական ջանք է պահանջում»,- ասաց Պապյանը։