Չխաբվե'ք կեղծ պայքարին, պատրա'ստ եղեք մեր կանչին

Չխաբվե'ք կեղծ պայքարին, պատրա'ստ եղեք մեր կանչին

Կեղծ փրկիչների գլխավորությամբ արդեն երկու շաբաթ շարունակվող փողոցային ակտիվությունն ամբողջությամբ հաստատեց մեր գնահատականն ու կանխատեսումը։

Ուկրաինական ռազմաճակատում ձախողվելու և միջազգային մեկուսացման ենթարկվելու հետևանքով փլուզվող Ռուսական կայսրությունն ակտիվացրել է իր 5-րդ շարասյան ներկայացուցիչներին, որպեսզի 2018-ի կեղծ հեղափոխության տարբերակով խաբի մեր ժողովրդին և օգտագործի իր շահերի համար։

Իսկ կործանվող Ռուսական կայսրությունը ներկայումս մեկ նպատակ է հետապնդում՝ որքան հնարավոր է հետաձգել իր անխուսափելի հեռացումը մեր տարածաշրջանից և այդ ժամանակն օգտագործել տարածաշրջանը Արևմուտքի փոխարեն Թուրքիային ու նրա կրտսեր եղբայր Ադրբեջանին հանձնելու համար։

Նիկոլ Փաշինյանի դավաճանական վարչակազմը և այսօր նրա դեմ պայքարող նախկին դավաճաններն ու կեղեքիչները Մոսկվայի զույգ ձեռքերն են և նրանց միջև պայքարը Մոսկվայի կազմակերպած էժան բեմադրություն է։

Նրանք Մոսկվայի սարքած խաղի մեջ հանուն իշխանական կերակրատաշտի պայքարում են միմյանց դեմ, իսկ Մոսկվան այդ պայքարն օգտագործում է երկու խնդիր լուծելու համար․

1) համեմատաբար լավ գներով Արցախը վաճառել Ադրբեջանին, իսկ մնացյալ Հայաստանի Հանրապետությունը՝ Թուրքիային,

2) զուգահեռաբար արժեզրկել ու խափանել ազգային-ազատագրական պայքարը և թույլ չտալ, որ ժողովուրդը համախմբվի ազգային ուժի շուրջ և կարողանա իսկապես փրկել Արցախն ու ամբողջ Հայաստանի Հանրապետությունը։

Նիկոլ Փաշինյանի դավաճանական և ատելի վարչախմբից օր առաջ ազատվելու ցանկություն ունեցող մեր հայրենակիցներին հորդորում ենք լինել շրջահայաց ու կուլ չտալ թշնամու խայծը։

Միշտ նկատի ունեցեք, որ թշնամին նենգ է ու խորամանկ։

Տեսնելով, որ իր հրահանգով ասպարեզ իջած վարկաբեկված ու մաշված դեմքերը չեն կարողանում լուրջ արդյունքի հասնել, Մոսկվան շուտով խաղադաշտ է մտցնելու իր պահեստային նստարանի նոր խաղացողներին։ Նրանք համեմատաբար ավելի դրական կամ չեզոք այնպիսի կերպարներ են, որ Մոսկվայի հրահանգով հատուկ այսպիսի իրավիճակների համար նախապես շինծու հեղինակություն են ձեռք բերել բարեգործությամբ, մարդկանց իրավունքների ու շահերի պաշտպանությամբ, հայրենասիրական ճառերով կամ արտաքուստ գրավիչ այլ մեթոդներով։

Կոչ ենք անում զգոն լինել, չխաբվել ներկա դավաճանների դեմ դուրս եկած նախկին դավաճաններին կամ սրանց թաքնված փոխարինիչներին և սպասել մեր կանչին։

Մենք սխալվելու իրավունք չունենք, քանի որ սխալվելու դեպքում կորցնելու ենք մեր Հայրենիքը և մեզ համար թանկ ու կարևոր ամեն ինչ։

Պատրա'ստ եղեք մեր կանչով դուրս գալու հրապարակ, ազատելու երկիրը գաղութային կոռուպցիոն-թալանչիական համակարգից ու նրա սպասավորներից և ձևավորելու ազգային անցումային կառավարություն։

Ազգային-ժողովրդավարական բևեռի խորհուրդ

30 ապրիլի 2022 թ., Երևան