Ինչն է պղծումը եւ ովքեր են պղծում

Արցախի այսպես կոչված դրոշը ներկելու միջոցով Հայաստանի դրոշ դարձնելու ակցիայի վերաբերյալ կգբ-ականները քարոզչական գրոհ են սկսել, ասելով, թե դա դրոշի պղծում է։

Ցավոք սրտի, նրանց երբեմն երկրորդում են երեսուն տարի շարունակ կգբ-ի հորինած պետականասպան տեսակետների ազդեցության տակ ընկած մեր որոշ մոլորյալ հայրենակիցներ։

Գործակալներին առանձնապես ասելիք չկա, ընդամենը թող իմանան, որ պատասխան են տալու.

1) Արցախը Հայաստանին վերամիավորելու համար ազգային-ազատագրական պայքարի ելած մեր միլիոնավոր հայրենակիցների զգացմունքները, քրտինքը, արցունքն ու արյունը պղծելու համար,

2) Արցախի կեղծ անկախության գործընթացի միջոցով դեռեւս 1920 թ. փետրվարի 24-ից ըստ միջազգային լեգիտիմ փաստաթղթերի Հայաստանի Հանրապետության մաս կազմող Արցախը Հայաստանից անջատելու եւ, ըստ այդմ, մեր նախնիների մաքառումն ու հաղթանակը պղծելու համար,

3) Հայաստանի Հանրապետության ինքնիշխանության եւ տարածքային ամբողջականության գաղափարները պղծելու եւ դրանց դեմ տասնամյակներ շարունակ ոտնձգելու համար,

4) Արցախը որպես Ռուսաստանի մանրադրամ պահպանելու եւ, հարմար պահին, որ իրենց ջանքերով եղավ 2020 թ. աշնանը, պայմանավորված պատերազմով ռուս-թուրք-ադրբեջանական դաշինքին հանձնելու համար,

5) Հայաստանի Հանրապետությունում իշխանությունը յուրացնելու եւ պետությունը զավթելու, այնուհետեւ` պետությունը որպես պետականության ու տարածքային ամբողջականության դեմ գործիք կիրառելու, ինչպես նաեւ Հայաստանի Հանրապետությունը տարածաշրջանի ռուս-թուրքական ճարտարապետության պահապան շան վերածելու համար, դրանով իսկ` մեր ազգային արժանապատվությունը հավելյալ կերպով պղծելու համար,

6) այս ամենից բխող այլ դավաճանությունների եւ անլուր հանցագործությունների համար, որոնց չարաղետ արդյունքը եղավ մի ամբողջ սերնդի պղծումը, Հայաստանի նորօրյա մասնատումն ու նրա գոյության վտանգումը, դրանից բխող` նոր ցեղասպանության եւ վերջնական հայրենազրկության սպառնալիքը։

Իսկ մեր մոլորյալ հայրենակիցներին տեղեկացնում ենք, որ պետությունը կարող է մեկ դրոշ ունենալ եւ մեր պետության դրոշը եռագույնն է։ Մինդեռ մեզ որպես պառակտման, կոտորածի, Արցախի տարածքի եւ պետականության կորստի խորհրդանիշ պարտադրված Արցախի այսպես կոչված դրոշը ոչ այլ ինչ է, եթե ոչ մեր ազգային-պետական ինքնության պղծում եւ ժխտում։

Ուստի յուրաքանչյուր հայի եւ քաղաքացու պարտքն է ամենուրեք հաստատել Հայաստանի միակ դրոշը` եռագույնը եւ մերժել ու դատապարտել բոլոր նրանց, որ կփորձեն մեր գլխին դնել պառակտման կգբ-ական խորհրդանիշ-պղծությունը։

Հ.Գ.

Կլինեն նաեւ մարդիկ, որ կասեն, թե մենք քվեարկել ենք հանուն Արցախի անկախության, մեր զավակները կռվել են այդ դրոշի տակ եւ այլն, եւ այլն։ Նրանց կպատասխանենք, թե սիրելի հայրենակիցներ, բոլորս էլ խաբվել ենք ու սխալվել եւ դրա պատճառով հազարավոր զավակներ ու Հայրենիք ենք կորցրել։ Եվ կշարունակենք կորցնել, եթե դուք շարունակեք ձեր կենսագրության դրվագները վեր դասել ազգային-պետական նպատակից ու շահերից։
Սխալվել եք եւ վե'րջ։ Ուղղե'ք ձեր սխալը։