Հայաստանի Հանրապետությունում Ֆրանսիայի Արտակարգ և լիազոր դեսպան Նորին գերազանցություն տիկին ԱՆՆ ԼՈՒՅՈՅԻՆ

Ձերդ գերազանցություն

Մինչ քաղաքակիրթ ազգերը միջուկային վտանգին դեմ հանդիման համախմբվել են հանուն ժողովրդավարության ու մարդկության առաջընթացի հաղթանակի և ընդդեմ բռնատիրության հետ հաշվի նստելու հեռանկարի,

մինչ Ուկրաինայի հերոսական ժողովուրդը հանուն այդ արժեքների կենաց-մահու կռիվ է տալիս բռնապետության իրավունքի վերահաստատման նպատակով չարիքի Ռուսական կայսրությունը վերականգնելու պուտինյան ցնորական պլանի ու նրա գիշատիչ հորդաների դեմ,

այդ նույն արժեքների ակունքներից ծնված և հազարամյակներ շարունակ, այդ թվում` 2020 թ. 44-օրյա դավադիր պատերազմի ժամանակ, հանուն դրանց իր լավագույն զավակների կյանքը զոհասեղանին դրած Հայաստանն ու հայությունը մնում են ռուս-թուրք-ադրբեջանական հակամարդ և հակահայ դաշինքի պետականակործան, ցեղասպան ու հայրենազրկիչ վտանգին դեմ հանդիման։

Ուկրաինայի դեմ Ռուսաստանի ագրեսիայի նախօրյակին նրա հետ ռազմավարական դաշինքի վերաբերյալ հռչակագիր ստորագրած Ադրբեջանը, օգտվելով ուկրաինական ճակատում բռնապետության հարձակմամբ ստեղծված խառը իրավիճակից, Ռուսաստանի աջակցությամբ և Թուրքիայի հովանավորությամբ նոր թափով է վերսկսել Արցախը էթնիկ զտման ենթարկելու և նոր պատերազմի սպառնալիքով Հայաստանին ու հայությանը ազգային ինքնությունից ու պետականությունից զրկելու փաստեր ու փաստաթղթեր պարտադրելու ռուս-թուրք-ադրբեջանական ծրագիրը։

Այդ ծրագիրը ենթադրում է Ռիբենտրոպ-Մոլոտով տխրահռչակ պակտի նախատիպ ու նախադեպ Լենին-Աթաթուրք պակտի (1921 թ. մարտ 16-ի Մոսկվայի և 1921 թ. հոկտեմբերի 13-ի Կարսի ապօրինի պայմանագրեր, ի կատարումն դրանց ոգու և տառի` բոլշևիկյան Ռուսաստանի կուսակցական ու վարչական այլ ապօրինի ակտեր, այդ թվում` 1921 թ. հուլիսի 5-ի ՌՍԴ(բ)Կ Կովկասյան բյուրոյի` Արցախը Խորհրդային Ադրբեջանին հանձնելու վերաբերյալ որոշում) նորովի իրականացմամբ Հայաստանի ու ամբողջ Հարավային Կովկասի կլանում և վերաբաժանում` այն դարձնելով բռնապետության քաղցկեղածին տարածաշրջան։

Ի կատարումն այդ ծրագրի, Ադրբեջանն արդեն ավելի քան մեկ շաբաթ առաջ վնասել է Սյունիքից դեպի Արցախ գնացող գազատարը, ինչի հետևանքով լեռնային ցուրտ կլիմա ունեցող Արցախի հայ բնակչությունը հայտնվել է հումանիտար աղետի շեմին։ Միևնույն ժամանակ` Ադրբեջանը շփման գծին մոտ գտնվող բնակավայրերի հայ բնակչությանը զենքի ուժով սպառնում է լքել իրենց տունն ու Հայրենիքը։ Զուգահեռաբար` այդ եռյակ դաշինքը հայ ժողովրդի գլխին դամոկլյան սրի նման կախած է պահում նոր պատերազմի սպառնալիքը, որպեսզի Հայաստանը չհամարձակվի դիմադրել։

Շատ ցավալի է, որ Մոսկվայի խամաճիկ հայաստանյան ղեկավարությունը ոչ միայն քայլեր չի ձեռնարկում այս պարտադրանքը խափանելու ուղղությամբ, այլև սպասարկում է այն։

Մենք պնդում ենք, որ փաշինյանական ռեժիմը ոչ միայն չի ցանկանում բռնել Արևմուտքի օգնության ձեռքը, այլև նրա հետ հարաբերությունների իմիտացիա է անում Կրեմլի թելադրանքով և հանուն նրա շահերի` սպասարկելով թե' Եվրոպայում և թե' Հարավային Կովկասում, ինչպես նաև Կենտրոնական Ասիայում, բռնապետական համակարգ հաստատելու հակամարդ ծրագիրը։

Փաշինյանի ռեժիմի հետ միասին այս ծրագիրը սպասարկում են նաև Կրեմլի հրահանգով նրա հետ պայքարի իմիտացիա բեմադրող մյուս ռուսական գործիքները` խորհրդարանական ընդդիմությունն ու այլ ռուսամետ շրջանակները։

Վերը նշվածի հաշվառմամբ, կոչ ենք անում.

1) Անհապաղ կերպով միջամտել և Ադրբեջանին ստիպել դադարեցնելու Արցախի հայ բնակչությանը հումանիտար աղետի և զենքի սպառնալիքի լծակներով էթնիկ զտման ենթարկելու բացահայտ ոտնձգությունները` պատժամիջոցների և միջազգային այլ գործիքակազմի միջոցով նրան պարտադրելով թույլ տալ վերանորոգելու Արցախը սնող գազի խողովակը, ինչպես նաև դադարեցնելու շփման գծի բնակավայրերի հայ բնակչության ահաբեկումն ու այդ բնակավայրերը լքելու պահանջները։

2) Միջազգային խաղաղության և անվտանգության թիվ մեկ սպառնալիքի վերածված Ռուսաստանին հեռացնել Մինսկի խմբի եռանախագահության ձևաչափից և Արցախի հարցի լուծման գործընթացը վերստին ամբողջությամբ ներառել Մինսկի խմբի առաքելությանը համապատասխանող կազմի օրակարգ։

3) Թուրքիային զրկել Հայաստանի վրա ազդելու հնարավորություններից, առաջին հերթին բացառելով հայ-ադրբեջանական հակամարտության մեջ նրա որևէ դերակատարումը, ինչպես նաև հայ-թուրքական հարաբերությունների կարգավորման գործընթացում նրա կողմից նախապայմանների ներկայացումը։

4) Հայ-Ադրբեջանական հակամարտության կարգավորման մյուս առումները` տարածքային ամբողջականության, սահմանների և հաղորդակցության ուղիների վերաբերյալ, հանել Հայաստանի և տարածաշրջանի ռուս-թուրքական 1920-21 թթ. օկուպացիայի, խորհրդային և հետխորհրդային ապօրինի իրավաքաղաքական համատեքստերից և ժամանակավորապես սառեցնել` բռնապետության դեմ հաղթանակից հետո դրանք լեգիտիմ միջազգային-իրավական կարգավորման ենթարկելու նպատակով։

Հարգանքով՝

Ազգային-ժողովրդավարական բևեռի խորհուրդ

FR