ԵԱՏՄ մտնելուց հետո Հայաստանը կորցրեց որևէ կարևորություն Ռուսաստանի համար. Արա Պապյան
Պատերազմը սկսվեց, որովհետև խախտվել էր ռազմաքաղաքական հավասարակշռությունը։ Այս մասին ArmDaily.am-ի հետ զրույցում ասաց քաղաքագետ Արա Պապյանը՝ անդրադառնալով 44-օրյա պատերազմի տարելիցին։
Նա նշում է, որ խաղաղությունները պահպանվում են ոչ թե հայտարարությունների հիման վրա, այլ հավասարակշռության։
«Պատերազմը նման ելք ունեցավ, որովհետև տասնամյակներ շարունակ խոսքով էր արվել բան, իրականության մեջ գործով չէր արվել, և այդ ամբողջը շատ ավելի վատացավ, վերջին տարիների ընթացքում, երբ ներկա իշխանությունները ցանկացած գործին, որին ձեռնամուխ են լինում, չեն կարողանում մինչև վերջ ավարտել և որևէ իրական արդյունք տալ։ Այդ ամբողջը կուտակվեց, նաև աշխարհաքաղաքական որոշ իրավիճակ էր ստեղծվել, մասնավորապես կովիդի հետևանքով, ամերիկյան ընտրությունների հետևանքով և դրան նախորդած Թրամփի մեկուսացման քաղաքականությամբ՝ պահը իրենք հաջող օգտագործեցին և կարողացան սանձազերծել պատերազմ և մեզ պարտության մատնել»,- նշեց Պապյանը։
Ըստ քաղաքագետի՝ պատերազմ սկսելու պահը հասունացավ Հայաստանի՝ Եվրասիական տնտեսական միություն մտնելու պարտավորությունը ստանձնելուց հետո։
«Դրանից հետո Հայաստանը կորցրեց որևէ կարևորություն Ռուսաստանի համար, որովհետև հայտնվեց Ռուսաստանի գրպանում։ Դրա համար Ռուսաստանը որդեգրեց Ադրբեջանին սիրաշահելու և ՀԱՊԿ կամ ԵԱՏՄ մտցնելու քաղաքականություն, դրա համար միակ վճարը Ղարաբաղն էր, դրա համար էլ Ռուսաստանը չկատարեց իր դաշնակցային պարտավորությունները, մենք միայնակ հայտնվեցինք՝ բոլոր թերություններով հանդերձ, իսկ Թուրքիան շատ սերտ դաշնակցային պարտավորություններ ստանձնեց և իրականացրեց Ադրբեջանի նկատմամբ»,- ասաց Պապյանը։
Հարցին՝ պատերազմից մեկ տարի անց՝ ինչպես շարունակել ապրել, Պապյանը արձագանքեց. «Վերազինելով բանակը, վերակերտելով պետականությունը, խոսքից գործի անցնելով, նոր դաշնակիցներ որոնելով և գտնելով, հաստատելով։ Եթե մենք ամեն ինչ անենք նույնը, ինչ արել ենք մինչև պատերազմը, մենք կստանանք նույնպիսի արդյունք։ Չի կարելի անել նույնը՝ ակնկալել այլ արդյունք։ Դրա համար պետք է շատ բաներ փոփոխվի, որպեսզի առաջիկա պատերազմի ժամանակ նման խնդիրներ չունենանք»։
Նա նշեց, որ այս պահին Ադրբեջանն ու Թորքիան փորձելու են մեզանից առավելագույնը պոկել։
«Մասնավորապես Թուրքիան այդ երեք նախապայմանները, որը 90-ականներից առաջադրել է՝ այն է՝ Ցեղասպանության ճանաչումից հրաժարում, որևէ պահանջից Թուրքիայի նկատմամբ հրաժարում և հրաժարում Արցախից, այդ երեք պահանջները պետք է փորձեն ի կատար ածեն։ Երրորդը արդեն ի կատար է եղել, մնացել են առաջին 2-ը, ոնց որ թե Նիկոլ Փաշինյանն այդ երկուսին էլ է համաձայնել։ Այդ ամբողջը կանեն ձևականորեն ինչ-որ շարժում կսկսվի՝ սահմանի բացել և այլն, դրանից հետո ինչ-որ պատրվակով նորից կփակեն և լուրջ խնդիրներ մեր համար կառաջացնեն»,- նշում է քաղաքագետը՝ հավելելով, որ կոմունիկացիաների ապաշրջափակման քաղաքականությունը չի աշխատելու։
Անդրադառնալով բարձրաստիճան պաշտոնյաների՝ առանձին-առանձին Եռաբլուր այցելությանը՝ Պապյանը նշեց, որ իր կարծիքով՝ իշխող քաղաքական ուժի մեջ տարաձայնություններ կան։
«Ներընտանեկան հարաբերությունները չեմ կարող մեկնաբանել։ Կարող ենք ենթադրել, որ ներքին խնդիրենր կան իրենց մեջ»,- ասաց Պապյանը։
Հղում աղբյուրին՝