ԻՆՉ ՏՎԵՑ ՄԵԶ ՍԱՍՆԱ ԾՌԵՐԻ ԱՊՍՏԱՄԲՈՒԹՅԱՆ ՓՈՐՁԸ
Սասնա Ծռերի ապստամբության փորձի հիմնական նպատակն էր կանխել երկրորդ պայմանավորված պատերազմով Արցախի և ՀՀ ինքնիշխանության հանձնումը կամ, այլ կերպ ասած՝ Լավրովի պլանի, իրագործումը։
Ապստամբության փորձը հասավ իր նվազագույն նպատակին։ Ժողովուրդը թեև միայն մասամբ փողոց դուրս եկավ, սակայն իր ջախջախիչ մեծամասնությամբ աջակցեց Սասնա Ծռերին և վճռական ՈՉ ասաց Լավրովյան պլանին ու այն սպասարկող ազգադավ ռեժիմին։
Դրա շնորհիվ պայմանավորված պատերազմի միջոցով Լավրովյան պլանի իրագործումը հետաձգվեց։ Ինչպես հետո տեսանք, հետաձգվեց ավելի քան չորս տարով։
Եվ այս չորս տարին ճակատագրական է լինելու հայ ազգի ու պետականության համար։ Ասածս հիմա միգուցե շատ քիչ մարդ հասկանա, բայց ապագան ցույց կտա ճշմարտությունը։
Եթե այս պայմանավորված պատերազմը տեղի ունենար 2016-ին, ապա ազգային աղետն անխուսափելի կլիներ։
Ինչպես տեսնում ենք, միայն 2021-ին, այսինքն` ապստամբությունից ավելի քան չորս տարի անց, սկսվեց Ռուսաստանի կարգավիճակի ու գործառույթների գլոբալ կերպափոխման և, ըստ այդմ, Թուրքիայի դերի վերանայման, ինչպես նաեւ այդ համատեքստում Ռուսաստանի ու Թուրքիայի ռազմավարական զսպման գործընթացը։ Իսկ չորս տարին միանգամայն բավարար ժամանակ էր, որպեսզի Ռուսաստանը, Թուրքիան և Ադրբեջանը մեզ ամբողջությամբ կուլ տային։
Եվ, թեպետ մեր այս երեք թշնամիների համատեղ պլանները չեն փոխվել, սակայն էապես փոխվել են իրավիճակը և Արևմուտքի միջամտության արդյունավետությունը, ինչի շնորհիվ նրանց պլանները ձախողվելու են։
Ուստի, առանց չափազանցության կարող ենք փաստել, որ Սասնա Ծռերի ապստամբության փորձը մեզ տեղափոխեց ժամանակային հաջորդ չափում և դրանով խափանեց ազգային աղետը (պետականության կորուստ և վերջնական հայրենազրկում) ու հնարավորություն շահեց ազգային-պետական վերածննդի համար։